學識用安全套並唔容易，甚至難倒天之驕子嘅港大生。噚日10位港大醫學院醫科生喺校園擺陣，宣傳正確使用安全套，又用陽具模型測試同學識唔識用套，結果好多蝦碌場面發生。港大讀碩士嘅胡小姐戴套只係戴咗一半，冇拉到落底；港大一年級生梁先生唔識唧走安全套尖端的空氣，隨時令精液冇空間盛載。
嚟港大參觀嘅中山大學研究生彭先生亦接受挑戰，佢話內地性教育「基本上係零」，非常榮幸喺港大學識點用安全套喎。籌辦活動醫科生凌梓欣就話，自己以前讀天主校女校，性教育非常有限，「（生物堂）老師畀咗個過期安全套我哋睇」。另一位醫科生陳澤程指，唔少同學對安全套存在誤解，以為同時戴兩個安全套會更安全，或者以為女仔食咗避孕藥，男仔就唔使用安全套。