香港人旅遊成精，農曆新年有幾日紅假又點忍到唔飛，好似康泰旅行社咁，今年就受股樓暢旺帶挈，幾乎團團滿座，12萬玩22日嘅南美四國豪華團、萬二蚊5日嘅日本團，全部爆晒，呢個日本團都幾盞鬼㗎，帶大家去岡山參加「裸祭」，老中青男士着相樸手丁字褲出場，幫大家祈福，唔知團友會唔會女士為主呢？
仲想趁新年飛番轉，可以諗諗大年初一出發、由藝人金剛帶隊嘅台北4天團，5,000零蚊有得聽住金剛搞爛gag玩台北，得番少量名額咋。老細黃進達Jason話，新年估計生意會好一成。佢哋呢排仲推出唔少運動相關旅遊產品，好似嚟緊世界盃都有package，包賽事門票出售，最平每位盛惠2萬2。而長線不丹原來都幾受歡迎，Jason話𠵱家要去曼谷轉飛，考慮日後傾直航喎。