喺去年暑假期間，今個馬季開鑼之前，上季共被罰停了22個賽日嘅年輕騎師史卓豐，揚言要今季目標是贏40場頭馬，但今季83次賽事，截至剛周日（28日）已完成了42次，啱啱好過咗一半，史卓豐暫只得17Win，現時仲要停緊賽，要等到下周三（2月7日）谷草夜賽先可以復出，睇怕40Win嘅目標不一定能達成。
事實上，史卓豐對上一次贏馬已係元旦日，當日憑「放馬過來」及「武術冠軍」起孖，以為佢新一年轉運，點知之後狂食白果，認真慘情。再睇「放馬過來」，幕後已經等唔切豐豐停賽復出，將喺周日（2月4日）沙田日賽爭連捷，續跑三班田草1800米，由於豐豐停賽，故呢次不但要換人，仲要換上更強之雷神莫雷拉。
查賽績，葉楚航馬房的「放馬過來」上仗贏馬固然厲害，而前仗及大前仗咁啱均只負0.5馬位全得季軍，亦絕不簡單，大前仗頭馬赫然是後來已升至92分的經典一哩賽第三名馬「紅衣優駿」，而前仗頭馬「鈦金剛」剛在二班再贏。
照咁睇「放馬過來」目前70分仍居三班只負125磅，擺明大超班，睇怕豐豐只好透過電視機，眼白白望住呢一Win飛走。