眾所周知，練馬師榜最尾兩席分別由賀賢(尾二)及告達理(包尾)佔據，都有好一段日子。這晚（31日）第四場四班1200米香港足球會百週年紀念盃，結果就係由呢對難兄難弟包辦865.5元連贏位。
當中告達理旗下「喝采」在華人騎師蔡明紹後上爆冷開齋，單Win及組合獨贏A2分別派153及41元。五歲馬「喝采」以澳洲自購馬身份，上季在港出道，原本由文家良訓練，輸咗四場後上季中轉至告廐，亦一直冇入三甲最叻只跑第四。
上賽「喝采」夥拍蔡明紹跑田草1400米輸三個幾馬位，呢次原班人馬移師谷草1200米，早段包尾冇乜走勢，末段遲遲才從中叠如飛殺上，就此贏頸位，馬兒爆冷打開在港勝門，亦見證蔡明紹與告達理季內首度合作取勝。
告達理今季頭馬增至六場，超越賀賢由原本包尾升上現時尾二，惟告達理今晚卻未見露面，告廐目前只有20駒，要多取10Win至16Win達標，談何容易。賀賢則維持五Win變包尾大幡，累積三個月未嘗一勝。
華人騎師這晚上半場控制賽果，第四場分別由「慣勝積極」（潘明輝）及「大運舞台」（賴維銘）跑獲二、三名，就此開出華將三重彩。第四名則是李寶利座騎「精算八方」，四重彩派八萬九千元多啲。