本地騎師繼續精彩，今晚（31日）谷中前五場全部俾佢哋贏晒，其中又以黃皓楠最威。呢位24歲見習騎師頭場贏完師傅徐雨石旗下「紫雲星」未夠喉，到第五場二班一哩以蔡約翰馬房「達羅素」再下一城，從而自製一口1號馬孖寶。
由大馬主蕭百君持有的「達羅素」完全走出盆骨嚴重傷患，上季和今季已各贏兩場，今仗亦是本身首勝谷中一哩，單Win及組合獨贏A2分別派77.5及22.5元。
五歲馬「達羅素」上次跑一月盃三級賽得第三，這次降呢跑二班賽贏得輕鬆，沿途守第三位，直路迅速彈甩對手贏1.25馬位，目前評100分，料會加至107分左右。
「達羅素」有報名周日（2月4日）百週年紀念銀瓶（田草1800米三級賽）列正選，今晚勝出後依例匆出加七磅，明早（2月1日）以122磅入紙排位，仍合資格在周日出賽。
蕭百君表示「達羅素」今場配黃皓楠是蔡約翰的安排，他們一家人對騎師人選沒有所謂，無論本地或外籍騎師，總之發揮得好就可以，很開心「達羅素」在黃皓楠胯下交出頭馬。蕭百君更笑言賽後有讚賞黃皓楠，仲話錫晒他！蕭百君補充賽前對「達羅素」有一定信心，因蔡約翰透露馬兒狀態非常弗，周日會匆出跑百週年紀念銀瓶爭連捷，同場的同主馬「鷹雄」也會跑。
蔡約翰目前有44Win，領先排第二的徒弟羅富全11Win，衛冕冠軍可謂形勢大好。
第五場二至四名分別為「萬馬奔騰」、「龍船鼓響」及「中華盛世」，四重彩派6,020元。