華人騎師一哥梁家俊榮升父親成個月，卒之今晚（31日）佢憑第二場五班1800米呂健威馬房的「人間尋夢」，錄得個人新一年個人谷草首勝；「人間尋夢」一用新配搭即爆半冷贏開齋，單Win及組合獨贏A3分別派96.5及20.5元。
五歲澳洲自購新馬「人間尋夢」前年5月底開始服役，過去13戰一亞一季未贏過。今次換上首度操刀的梁家俊，早段守四五位，於轉入直路前已從外叠發力上前，爭取主動，最終直路衝贏所有對手贏頸位，馬兒打開服役勝門。
梁家俊早於1月21日已在沙田起孖，打開新一年頭馬紀錄，今晚贏埋谷草可謂功德圓滿。佢季內暫有23場頭馬，領先最接近的師弟巫顯東五場，在「告東尼獎」成績表上一枝獨秀。
呂健威表示「人間尋夢」幾經艱辛終於交出頭馬，此駒今季第一次出賽跑田草1600米，賽前做了不少功夫，結果跑第三算不錯，可惜其後腳部有少少事，停操一段時間，近期馬兒健康、操練俱正常，今戰快活谷1800米更為合適，很開心交出頭馬。而呂健威已連贏4個賽日，手風甚順。
第二場各項派彩都幾可觀，皆因二至四名順序由莫雷拉「想贏就贏」、潘頓「港林福星」及何澤堯「富貴榮華」拎到，均屬半冷或冷門，四重彩派超過19萬元。