開局唔錯嘅特首林鄭月娥，連一地兩檢等爭議都捱得過，點知因為律政司司長鄭若驊嘅僭建風波，民望急挫，如果係事實，惟有係成個娥班子一齊要陪葬。
據聞近日都有唔少人四出打探，鄭若驊若要重建公信力，有冇乜嘢好計仔？八方發現，唔少人即時吐出三個字：梁．振．英。吓，乜咁鬼反高潮，同「公信力」完全逆線走？
提得全國政協副主席個大名，梗係有因由！眾所周知，梁振英涉及收取澳洲公司UGL 5,000萬港元事件，有政黨已經向廉政公署舉報，但調查至今未有任何公佈。雖則一般而言，當局唔會評論個別案件，但既然有議員提及佔中搞手嘅起訴跟進時，鄭若驊都有回應話會盡快做決定，若然問起梁振英此個案，佢嘅回應係點樣？似乎都有啲「啟發性」。
難怪唔少花生友都話，梁振英其實係特區政府「救星」；至於點樣打救法，大家心知肚明！嗱嗱嗱，八方記憶中，冇人有講過律政司鄭若驊要點點點，嚟嚟去去都係話，如果夠證據，請記緊依法！