【今周主題：中超U23配額港超行得通？】
亞洲盃外圍賽過後，港隊下一個大賽，就係八月中喺雅加達舉行嘅亞運。但若果將目光放遠一啲，2020年奧運足球外圍賽即將嚟到，但港隊又有冇足夠嘅適齡人腳應付呢？
若要出戰2020年奧運，適齡球員將為97年或以後出生嘅球員。有球迷曾經做過粗略嘅統計，港超聯97年或以後出生嘅球員，合計起嚟都唔足23人，大部份球員亦只可以喺菁英盃（圖）上陣。
21歲，對於其他國家嚟講，已經算唔上十分年輕；不過對於香港球壇，恐怕仍等緊上位機會。強制畀U23上陣未必係最理想，但一定最快、最直接能夠令小將們受益。當然唔少人認為，呢個舉動將令港超聯失去叫座力。但係近年唔少球迷其實開心見到有料嘅本土小將上位，以今年省港盃港隊重奪冠軍後球迷興奮心情就可知一二，相信即使球隊因多用小將而表現失色，亦唔會重現當年嘅冰河時期，球場小貓幾隻嘅慘況。
近年，當我哋見到唔少東南亞國家喺青訓工作上取得相當唔錯嘅成果，我哋都不其然問一句，「幾時會到香港？」每個成功都唔係偶然。越南聯賽只准球隊註冊兩名外援；印尼甚至喺國際賽果敢用青年軍為亞運做準備。所以，必須有所行動，先可以改變現況。
文：亨少