【今周主題：中超U23配額港超行得通？】
中國足協實施具爭議性嘅新政，規定中超球會嘅U23球員數目要同外援相同，即球會派三個外援上陣，另一方面就要有三個U23土炮落場。呢個做法被批評係揠苗助長更有損年青球員嘅信心，全因球會可以走法律罅，比賽時秒速換走U23球員。但呢個做法亦有可取嘅地方，因為可以間接逼球會做好青訓，培養更多具質素嘅年青球員，港超聯可從中偷師。
以傑志為例，佢哋嘅眾多外援，盧卡斯、華杜斯及科蘭經常佔據大量上陣時間，令陣中年輕小將如李毅凱上陣機會唔多，而顏樂楓（圖）、羅梓駿、鄭展龍等自家青訓產品亦因缺乏表現機會而被外借。可能有人會質疑佢哋未夠班，不過如新政實施，佢哋一定會有更多試煉機會。
筆者亦都明白，未必個個青訓產品都能夠成材，十個入面有一個林嘉緯已非常難得。為咗迎合呢個政策，球會心甘情願抑或不情不願都好，定必會投放更多資源落青訓，以培養更多可見大場面嘅年青球員。
當然，呢個政策係針對中超嘅富豪球會，唔可以完全套用喺港超球會度，因此必須有所調整，例如喺人數方面可以微調，改成「如派出三個外援上陣，另一方面就要兩個U23土炮落場」，畀球會有時間適應。
文：聰鳴