現年52歲嘅日本女星柏原芳惠入行將滿38年,想當年佢係80年代當紅偶像,多年來都keep住最佳狀態,上年就推出性感寫真集《YOSHIE MODE》滿足粉絲,今年3月25日將舉行春季dinner show,4月又會推出收錄佢親自填詞作品嘅迷你專輯《芳惠詩集》。
柏原芳惠曾被雜誌《週刊文春》爆料指發展不倫戀,對方比柏原芳惠年長22歲,就算男方有妻兒,但最後都拆散大好家庭,柏原芳惠同男友已經喺埋超過25年,雙方關係等同夫妻,不過男方已經70幾歲,近年健康更急轉直下,有指柏原芳惠減少工作照顧另一半。
最近,柏原芳惠受訪提到生活上有新體驗,事關佢已經近40年冇用自動售賣機撳汽水,當佢日前收工時,突然發現眼前嘅汽水機就問助手借咗個500円,點知柏原芳惠揀完飲品後,呆住企喺度等部機器找錢,助手見狀才解釋佢知今時今日嘅汽水機係點用,連柏原芳惠都笑言自己大鄉里。