上星期五本欄提及潮州富豪，最著名者有李嘉誠與盤谷銀行陳弼臣，講歷史，當然陳弼臣更早，李嘉誠開辦塑膠廠時，陳弼臣在東南亞已經威名遠播，好多東南亞華商無不倚賴陳弼臣嘅盤谷銀行做生意。
日前在飯局遇到陳弼臣先生長子陳有慶，佢對左丁山講：「喂！聽講你介紹過郭鶴年傳，你有冇睇第六章呀？」哎，好彩有讀過，否則無言以對。點解會讀呢類書籍及掌故呢？皆因左丁山在銀行界服務年代，有兩三年專跑東南亞搵貸款生意（1981年中至84年初），每個月都在星馬泰印菲台飛來飛去，對泰菲印台（因生意較多）尤其去得多，同當地人客講起，知道幾乎每個客戶都已是盤谷銀行客仔，印尼一間巨型水泥廠嘅財務部總經理竟然係盤谷銀行派過去嘅，可知盤谷對東南亞商場影響之大。
盤谷咁巴閉，當然就係陳弼臣先生之功勞。依家睇番郭鶴年自傳現身說法，不得不佩服陳弼臣相人眼光之銳利及放款之快狠準，其他銀行無法子同佢爭。郭鶴年自傳第六章講「首次貸款」，話說於1948年郭父過身後，郭氏兄弟於1949年2月註冊成立郭氏兄弟有限公司，與吉隆坡英軍貿易部談判柔佛州南部大米代理權，英軍應允，但要10萬元（馬幣）信用擔保，於是郭鶴年去搵滙豐銀行分行經理，因平時打高爾夫球有啲交情，經理（當然係英國人）要求十萬元定期存款做擔保，咁即係話郭氏兄弟擔保番自己啫，十萬元當時已是一大筆錢，新成立公司邊度可以「責死」自己資金呀？郭鶴年認為滙豐借錢畀白種人就易，借畀華人就難，係種族歧視。因緣際會，從朋友得知盤谷銀行大老闆陳弼臣會由曼谷到新加坡，於是即刻加入米商大隊（約五十人）到機場接機，排隊與陳弼臣握手，郭鶴年唔夠30歲，排到好後，陳弼臣好奇，問佢係邊個，於是交換名片。點知幾日之後，收到電話，陳弼臣會去探訪郭氏兄弟公司，郭鶴年當然在場迎接介紹公司，視察詢問過後，陳弼臣竟然對佢講：「銀行給你公司一千萬元信用擔保，五百萬銀行承兌信用證（Trust Receipt）」，郭鶴年一聽，幾乎呆了，喜出望外，當然視盤谷銀行為大恩人，郭鶴年講當年所有英資銀行不願對華商提供無擔保貸款，一般華人資本銀行也保守到極只有陳弼臣例外。佢認為銀行業係一個無情的行業，所以時常講：「銀行家不是我的朋友，只是朋友當中碰巧有一些銀行家。」