近日最歡樂的政治新聞，肯定是希拉莉在甘美獎頒獎禮特別客串朗誦《火與怒》，三言兩語不折不扣話短情長，開講有話君子報仇三年未晚，何況惡霸登基不過一年，雖然傷口灑鹽稍欠大方，洩洩心頭恨倒有助生理心理健康。這本關於現任美國總統的黑材料暢銷書，出版當晚善長仁翁已經山長水遠傳來電子版，因為事忙一直未有時間打開，所以希女士滿臉笑容閱讀選段真是耳目一新：「長久以來他害怕被人落毒，因此喜歡去麥當勞開餐。沒有人知道他會突然出現，已經煮好的食物非常安全。」哇咔咔咔，麥記公關簡直可以直接購買版權當做廣告，慳水慳力事半功倍，連好日唔幫襯的稀客都會蜂擁而至，爭相享用安全至上的總統套餐。特朗普支持者紮紮跳不在話下，直指「希魔」落選後患上末期眼紅症，事無大小口沒遮攔的推特專家卻迄今未有回應，不知道是不是嬲到頭暈手震，連艾瘋都揸唔穩？
心涼的圍觀者當然明白，政壇除了大門口的兩隻石獅子乾淨，沒有誰不污糟邋遢，就像坊間麻甩佬常掛唇邊的「入得娛樂圈預咗畀人搞」，入得官場的三山五嶽好漢，唔係衰A就係衰B，當日進駐白宮的假如是克林頓夫人，櫃裏的骷髏骨一樣會被揭開曬日光浴，特朗普之所以額外引人注目，是一次過衰齊二十六個字母。還是親愛的老朋友瑪嘉烈最通透，年前返港茶聚吹水，她說寶貝兒子已入大學，馬上就要出來做事：「我話佢知，仔啊仔，第日你做咩都好，拜託千祈唔好從政，事關你阿媽後生嗰陣做過好多衰嘢，一定會畀人挖番出嚟唱通街。」