NBA總冠軍勇士最犀利嘅殺手鐧之一，梗係史堤芬居里嘅準繩三分波。居里喺今季NBA常規賽嘅三分命中率高達43%。一位同居里一樣，喺加州搵食嘅靚女，日前喺社交網站上載咗一段短片引嚟幾大迴響。呢位叫安娜瑪莉（Rachel Annamarie DeMita）嘅小姐，喺片中連射10球3分波中咗8球，相當神準。
安娜瑪莉成長於美國俄亥俄州，喺當地有打過8年籃球，參加過正式比賽。到大個女佢就搬去西岸住喺加州洛杉磯，活躍於網絡做youtuber，講下流行文化同時裝，亦冇浪費佢咁標緻嘅外表，兼做模特兒工作。安娜瑪莉熱愛運動，喺佢嘅instagram戶口rademita裏面，除咗唔少健康性感相之外，有唔少係佢進行唔同運動嘅時候影嘅，當然最主要梗係佢最愛嘅籃球。日前上載佢射3分球嘅短片，好快已經有過百萬人次點擊睇過，認真犀利。