如無意外會喺今年冬季轉會窗標王，巴塞隆拿以1.6億歐元（約15.6億港元）收購嘅菲臘比古天奴，喺周日西甲終於首次代表巴塞正選，主場迎戰艾拉維斯一仗上陣。古仔今場表現唔算突出，到下半場被調離場，當時落後一球嘅巴塞連入兩球反勝2:1。雖然古仔冇乜料到，但巴塞總算全取三分，仲追平隊史開季最長不敗紀錄21場，有機會喺下星期到達新里程碑。
2:1反勝艾拉維斯
古天奴喺月初以天價加盟利物浦，但有傷要到上周四西盃八強次回合先首次上陣。周日西甲，古仔終於第一次擔正，不過論表現就只屬一般，上半場作出36次傳球，但就冇太大實際貢獻，到下半場踢咗21分鐘，終於被調離場，由柏高艾卡沙入替。
巴塞今場波贏得驚險，艾拉維斯喺上半場23分鐘爆冷先開紀錄，約翰古達迪單刀搞掂領先1:0。巴塞攻勢多但一直扳平唔到，到72分鐘先由蘇亞雷斯射入追平；到84分鐘美斯主射罰球直接破網，奠定2:1勝局。呢球亦係佢喺西甲累積第21個罰球入波，以一球領先死對頭基斯坦奴朗拿度。
華家軍追平哥帥紀錄
巴塞全取三分繼續喺榜首領先，18勝三和得57分領先第二位嘅馬德里體育會11分，呢場波更大意義係球隊保持開季21場不敗，追平咗2009/10球季由哥迪奧拿所造出嘅隊史開季聯賽最長不敗紀錄。當年哥帥嘅巴塞17勝四和，計成績𠵱家華維迪嘅巴塞仲好啲。
華維迪今季接手巴塞，喺季前西超盃慘敗畀皇馬，之後就越踢越好，至今一直未再輸過波。對於古天奴喺首次正選上陣表現一般，華帥喺賽後話：「球員唔係機器，唔好以為一撻就可以開到最大馬力，況且我覺得佢喺今場波踢得唔差。我希望古仔會慢慢進步，之前一場波佢踢20分鐘，到今場就再多少少，我希望佢會慢慢去適應。」巴塞下場西甲將會喺下周日作客愛斯賓奴，屆時華維迪就有機會打破哥帥紀錄創新歷史。