上任僅41日嘅澳門文化局局長謝慶茜，噚日以個人健康為由請辭，即日生效，係澳門政府13個月內，第3位離任局長，澳門當局暫未公佈接任人選。
謝慶茜去年底空降做局長，被澳門文化界質疑欠缺文化專業背景同學歷，擔心「外行人管內行人」。而據澳門媒體《愛瞞日報》報道，謝慶茜盛傳同澳門特首崔世安太太霍惠芬關係密切，謝亦係交通局局長林衍新妻子。八方聽聞，澳門坊間流傳謝慶茜係權貴「契女」，對有人忽然上位，質疑係用人唯親，崔世安就多次澄清自己冇「契女」。謝慶茜原任旅遊局副局長，去年底獲任命做文化局局長，至本月中旬傳出患病消息。據報曾想安排嚟香港睇病，但最終留喺澳門，由專科醫生診治。