泰國A做東請食飯，叫大家去灣仔古琴，左丁山問佢：「咪有傳聞話古琴老闆唔再做，成班伙記要另找門路嘅？」泰國A話：「曾經有此消息，但聽講最後唔捨得班伙記及熟客，於是改變心意，繼續砌落去。事實上，有客路就無謂放棄啦，另起爐灶都幾大成本㗎。」
泰國A講得冇錯，當今香港食肆數目如恒河沙數，做得好，打響名堂，最不容易，古琴既已有一定基礎，如不斷改善，會好過不少食肆嘅呢。
泰國A事先宣揚，會有驚喜，左丁山心諗一定係潮州美食，搵大廚偉哥炮製拿手好戲，潮州式紅燒大包翅啦，於是當日唔食早餐，留定個肚去食，點知人不勝天，前一日不知何故，染上傷風咳，認真麻煩，於是到咗古琴之後，因為要趁熱食，一開波就食潮州翅，吃到胃口大開，對泰國A講：「喂，人人加多一碗啦，騰訊一日升六蚊已夠你請食幾十碗啦！」泰國A哈哈大笑：「我係潮州人，可惜冇潮州新一代細胞，唔識買潮州人股票，買咗馬化騰，林順潮就好掂啦！」講吓笑啫，食嘢不可太貪心，泰國A投資好穩陣，揸住晒一啲高息藍籌股，唔會去博希瑪眼科呢類股票嘅。順便問吓在座諸公，誰人揸最多騰訊，點知個個都話冇，既然已錯過蘇州艇，無謂再追，各人多已退休，唔肯再搏殺嘅嘞，一於不賣手持股票（等升），也不買更多股票（不高追），如地產F話齋：「無謂同北水爭鋒。」左丁山身經1987股災慘劇，受過大教訓，記得當年8月，橫睇掂睇，再加華資收購怡和集團消息滿天飛，覺得恒指只會升不會跌，點知到咗10月就輸到直晒。2018年是否會有泡沫爆破，唔敢講，亦都無謂潑冷水。
是日古琴大廚偉哥大顯身手，整一味非常簡單嘅普寧豆腐（炸），各人吃到高聲呼好，素來只食好嘢嘅地產F連吃四件，話好食過鮑魚喎，可惜左丁山有傷風咳，唔敢吃煎炸食物，經理鳳姐連番勸食，都係閉口不敢吃，忍得真辛苦，其後又有特別（可遇不可求）從汕頭運到嘅蠔仔，十分肥美，泰國A特別推薦，保證乾淨，各人好驚有肚屙風險，怕吃，左丁山因為有幾樣炸物不吃，肚仔餓，於是聽泰國A講，吃掉十隻炒新鮮汕頭蠔仔，果然是鮮味非凡，其後又有不同潮州甜品，又係因為怕咳而不敢吃，泰國A話：「睇你流晒口水，下次你自己嚟食呢張菜單嘞！」