八方預告過，工黨張超雄出手修訂《2017年僱傭修訂條例草案》，牽一髮動全身，若果工聯會唔支持，又會被人鬧出賣工人利益，令到頭戴民聯建同工聯會兩頂帽嘅鄧家彪（圖）參選立法會新東補選時好尷尬，若然支持又會俾工黨攞彩，似乎又唔多着數，最終要政府定立法會主席梁君彥出手解圍？噚日終於有結果！
梁君彥似乎都知道呢鑊嘢「杰」，所以下午公佈張超雄嘅4組修訂，批出3組，有1組唔批，理由好冠冕堂皇，話個修訂改咗條草案主題嘅效力，簡單講可以話係因離題而唔批，咁個波就去番政府度。勞福局長羅致光見到咁嘅狀況，隔咗1個鐘就死死地氣出信畀立法會，話要撤回原於明天二讀嘅草案，理由係張超雄嘅修正案未經勞顧會傾，政府要深入研究先喎！
張超雄強烈譴責政府此舉剝奪議員提修訂嘅天職，指政府理由其實係藉口，真正理由只係唔想建制派喺補選時尷尬箒，估唔到政府會為家彪而kill bill。