企業想激勵員工士氣，方法有好多種，不過都離不開加人工、「加假」最直接實際。繼舊年年尾恒生（011）一姐鄭慧敏一上場就「加假」振軍心，再有一間銀行宣佈「加假」！
中銀香港（2388）由今年起新增中基層員工年假天數2至3天，仲有生日假1天，嘩，生日可以放假，真係連華華都未享受過。員工另外仲有6天婚假、3至6天喪假及每年2天全薪事假，處理緊急家庭事務，又真係幾唔錯。
講完假期，當然要數吓做銀行最「着數」嘅地方，就係樓按同貸款息率優惠。中銀員工可享有買樓貸款福利，貸款額上限為同事月薪120倍，最高貸款額2,000萬港元，貸款年期30年。有財務需要嘅員工，仲可以申請免息私人貸款，貸款額為同事月薪4倍，最長還款期為3年。
不過華華就覺得，中國人觀念，借錢唔係幾好，都係「加假」陪屋企人啦！
李華華