做得手機開機相，主角一定對手機持有人極重要，但相信大家估唔到，青年民建聯主席顏汶羽一開機見到嘅唔係佢太太，而係民建聯前立法會議員陳鑑林。「我每日都會望住諗吓，如果係鑑林，佢會點諗呢個議題或政策？」嘩，顏太會唔會呷醋㗎？
當年申民記實習遭拒
30歲嘅顏汶羽早前自薦加入新成立嘅青年事務發展委員會，已經面咗試，過唔過關仲未知，但食檸檬嘅滋味佢早就嚐過。喺嶺大修讀經濟、研究公共政策嘅佢，大學二年班時搵暑期實習，除咗喺香港政策研究所返工，亦申請咗民建聯實習計劃，「但佢哋唔收我，哈哈！」拒收原因好簡單，因未能連續兩個月實習，以為好夢成空，點知收到陳鑑林議辦來電邀做intern。汶羽喺翠屏邨同德福花園，即係鑑林嘅九東地盤長大，難怪被相中，佢引述鑑林話，「你讀政策研究卻肯做地區工作，好難得」。
佢其後幫鑑林做兼職助理，返工多過返學，2007年為現時已做咗副局長嘅陳百里喺區議會助選，2011年到佢參選觀塘區佐敦谷選區得咗，鑑林鼓勵佢繼續進修，於是完成碩士課程後𠵱家攻讀博士。佢嘅一段姻緣亦同民建聯有關，大學時代已認識嘅太太畢業後喺民建聯返工，咁啱佢當時係副發言人，近水樓台擦出愛火，2013年共諧連理。