Emoji表情公仔會喺今個農曆新年，跳出手機屏幕同大家迎新歲。大埔新達廣場即日起至2月28日期間，特別喺一樓展場設有五大emoji主題佈置，「馬戲團表演大舞台」內會有立體小丑同兩個妙趣emoji，技藝高超咁表演叠羅漢，而喺「運轉乾坤旋轉木馬 」中，三隻駿馬英姿颯颯，伴以心心同櫻花emoji佈景，喺2.8米高嘅旋轉木馬展現凌厲跑姿。
場內亦設置兩個心心相印熱氣球，其中一個綴以黃色蝴蝶結，另一個就有一對emoji情侶坐喺吊籃內，側邊仲有一棵桃花，至啱愛侶趁情人節喺熱氣球前甜蜜拍照。
總計場內36個emoji圖案，相信為一眾市民提供唔少打卡位，兩個emoji人偶更會喺場內新春巡遊，同市民selfie拜早年。