啱啱公佈嘅全國政協委員港區特邀名單，兩位前梁班子局長榜上有名，包括食衞局前局長高永文同保安局前局長黎棟國。既然得到國家嘅厚愛，自然都要加多幾分努力回饋，八方發現民望高喺呢場因為DQ風波引發嘅3.11補選，相當落力地為建制派參選人助選。
繼為九龍西出戰嘅民建聯鄭泳舜同喺新東征戰嘅工聯會鄧家彪，以不同形式助選造勢後，高永文噚日朝去到香港仔，力撐出戰港島嘅新民黨南區區議員陳家珮，自言一直非常欣賞家珮，覺得對方長時間投入地區工作而非空降部隊，自爆仲喺政府做局長時，不時收到家珮嘅「投訴」，都係同佢議會工作有關，又指育有一歲B嘅佢要家庭與事業兼顧好難得，希望新民黨繼葉劉淑儀同容海恩外，再多一位能幹女士入局喎。