「你唔x回應！」五個字，惹得大人紮紮跳，連在電視廣告大讚火鍋店示範浸吓浸吓的某位過氣泛民大佬，氣得生蝦咁，兇浸大兩位被停課的學生：以為道歉就得？成年人，社會棟樑，要負責任，唔係道歉就一筆勾銷！有如罪犯雖有悔意，仍需接受判刑！
嘩嘩嘩，唔通浸得多肥牛，除了發福過豬頭，人都會圓滑了，大佬弦外之音，聾都收到，潘鄭潘鄭，道了N次歉，是社會棟樑中的中流砥柱，竟然，對DQ與否，「冇補充」都懶講。唯有，市民浸大學生上身，將那句「你唔x回應」講777次！唔接受自己無誠信，但總唔會聽唔明「你唔x回應」裏頭市民怒火中燒的事實吧。有悔意嗎？噫，兩個地牢發水到超出地積比例，咁高章卻被迫還原，悔恨啊。要回應嗎？噫，司長當然關愛市民……鏡頭拉近，司長仿錢大康絕活……不，是所有政治既得利益紅人的絕技，就是：哽！咽！道歉被彈票，哽咽收貨嗎？喲，普通話點讀哽咽？潘鄭件事引起的社會不安，勁過一個x字，罰佢停職好嗎錢校長？