張建宗日前以署理特首身份主持行會前，煞有介事向傳媒話後日嘅立法會將會審議好幾條同勞工有關嘅法例，希望立法會通過。當時傳媒焦點都係律政司司長鄭若驊僭建風波，所以冇乜為意，原來當中有條法例「出事」喇，講到尾又同政府DQ議員有關。
選情或受累
話說第二次上立法會闖關嘅《2017年僱傭修訂條例草案》，排期喺後日恢復二讀。法例主要令遭無理解僱嘅打工仔，喺法院判決後復職，而唔再需要得到僱主同意，同時仲有月薪3倍或最多7萬幾蚊賠償。新東工黨張超雄提出修訂，包括將賠償金額上限推到10萬等，據知佢咁做令工聯會有壓力，據聞政府數過票，就算畀下台階工聯會同勞聯撐張嘅修訂，一樣夠票否決呢個修訂。
但喺呢個時候，連民建聯都有意見喎！佢哋覺得補選在即，循新東出選嘅鄧家彪入埋民建聯，無論工聯會最後可唔可以撐張嘅修訂，民主派鬧建制派出賣工人嗰陣，阿彪或會遭殃，選情受牽連。
咁點算好呢？聽講方法有兩個，一係就政府收番條法例，返去勞顧會傾過，變成四大皆空，一係就搵立法會主席梁君彥孭咗呢隻鑊，由佢出手唔批張超雄修訂，變成「本來無一物」，之不過要唔批張超雄嘅修訂又真係冇乜理據。
點都好，梁君彥好快就要交代批唔批修訂，八方覺得無DQ就無補選、無補選阿彪就唔使戴兩頂帽，DQ對建制派唔係百利而無一害㗎！
李八方