港島地方選區選舉主任鄧如欣DQ周庭，政府堅持選舉主任好中立，但有人就發現鄧如欣去年7月曾以東區民政事務專員身份擔任團長，率領香港東區青年網絡發展計劃嘅「東區青藤」青年學生一行40人到訪珠海出席座談會，接受珠海市僑聯專職副主席張英龍有關大灣區、一帶一路嘅「教導」，又參觀咗港珠澳大橋同橫琴自貿區規劃展廳同澳門青年創業谷。
Ｎ年前嘅網頁紀錄顯示，張英龍係中共珠海市委統戰部負責人之一；唔知呢個訪問團，係咪區議會活動之一，所以要鄧如欣親自率團？而1998年加入政務職系嘅鄧如欣，曾經喺多個政策局同部門工作，包括民政事務局、房屋及規劃地政局、保安局、特首辦同地政總署等，調任東區民政事務專員前係政制局首席助理秘書長。佢2016年亦處理過香港眾志羅冠聰同熱血公民鄭錦滿參選立法會議員嘅確認書，最終冇DQ兩人。