狗年就到，屬狗、龍、羊、牛、雞者會犯太歲，玄學家麥玲玲話傳統大年初一係農曆新年開始，但生肖年係以立春為界線，例如今年立春係2月4日，之前出生屬雞，當日或之後出世嘅已經屬狗。
林鄭屬雞多小人
犯太歲帶嚟嘅運程轉變亦由立春開始，屬狗者正值本命年，麥玲玲指除咗留意健康，心情上較易胡思亂想、情緒低落，但可辦喜事，如添丁、買樓、結婚化解，肖狗嘅律政司司長鄭若驊今年犯太歲，唔知鄭若驊會唔會買多幢樓呢？屬龍屬於相沖年，意味工作易有變動，感情上亦會離離合合，建議可外遊、搬家等。屬牛係刑太歲，人際關係差、易受傷擦損，腸胃方面要注意。屬羊刑加破太歲，要額外留意身體。雞屬害太歲，要提防有小人中傷，建議行事低調。屬雞嘅林鄭咁打得，怕且冇小人埋到身啩！
麥玲玲指，犯太歲者亦可以佩戴平價玉器飾物化解，屬狗要佩戴兔；屬龍要佩戴猴、鼠；屬羊要戴馬；屬牛戴鼠；屬雞戴蛇。不少人都會攝太歲祈福，立春過後嘅吉日包括新曆2月7日、8日和13日，而農曆年間就係舊曆正月初四、初八、十三及十六。
人會犯太歲，寵物又會唔會呢？麥玲玲話動物冇犯太歲概念，但較易感應家居磁場，今年病位喺西及北面，如果寵物瞓喺呢兩個地方，身體容易變差。