練馬師葉楚航今季谷草有兩駒都錄得3Win，分別為「紅星」及「僥倖」，絕對係馬房功臣。航哥亦好希望牠們可各自向第4捷進發，不過「紅星」11月上旬衝擊二班落第後，更因腳傷退出12月6日比賽，目前仍未復出。
至於「僥倖」三捷後，上次初上二班依然有水準演出，轉最後一個彎兜大圈大蝕位下，外疊衝上僅輸給頭馬「駿明珍寶」半馬位得第三，其實「僥倖」若蝕少一點已可勝出，不過幕後仍然信任柏寶，緊接本周三（31日）谷草夜賽，「僥倖」出王牌報名二班1200米，將繼續由柏寶操刀。
柏寶為咗騎「僥倖」，亦明顯作出配合，話說柏寶於1月17日策麥菲文馬房「藍海策略」犯規被罰停賽，本來騎師選擇押後服刑司空見慣，但柏寶竟然拖長至2月7日賽事才開始停賽，不說也明白，就係一心等埋「僥倖」，唔想錯過贏馬機會。
當時柏寶此舉似是配合「僥倖」可選擇報跑本周三夜馬或2月4日入過Ｑ的1400米，結果此駒於本周三上陣，柏寶可如願親手為牠爭四捷，梗唔希望肥水流入別人田。