華人練馬師今午（28日）開局順利，頭四場由佢哋贏晒，卒之第五場三班田草1200米，輪到外籍倉主報捷，主角高伯新與愛將巴度合作再贏「閃耀駿駒」一次，該駒連捷於同班同程，今場單Win及組合獨贏A1分別派56.5及17.5元。
六歲澳洲自購馬「閃耀駿駒」流過兩次鼻血，另有其他傷患紀錄，但今季由徐雨石改投高伯新，俾高伯新化腐朽為神奇，醫番好兼有第二春。此駒上仗大勝3.25馬位，以超強追勁氣走雷神策騎的全熱門「君達星」，呢次匆出冇換人、冇轉途程，雖變5.6倍次熱門，但仍有一定分頭。
「閃耀駿駒」今場沿途守八九位，直路不費吹灰之力，追過所有對手，後上再下一城贏兩馬位，兩戰共勝5.25馬位之多，今次俾佢擊敗的亞軍馬「裕豐泰」，咁啱亦係由雷神策騎的大熱門，「閃耀駿駒」可謂大熱剋星。「閃耀駿駒」搭「裕豐泰」的7.1倍大熱連贏亦告跑出。
有人快樂有人愁，「裕豐泰」大熱做阿二，本身仲未開齋，同場三、四名分別為「安騏」及「摯友無敵」，四重彩派四萬六千幾。而同場「晴朗拍檔」疑似健康有問題，臨場退出。