沙田馬場晨課今早(26日)出現兩位外籍靚女，站在欄邊睇馬，其中一人是法國騎師巴度的女友Eva，只見Eva含情脈脈睇男友操馬並等他收工，認真甜蜜。
巴度上季在港策騎時，Eva因工作關係並無全程留港陪伴，但今季巴度重臨客串，Eva連自己的歐美演藝工作也暫停，來港做跟得女友打氣，結果巴度搏殺手風更順，已有10Win成績相當好，並獲得不少練馬師如高伯新、霍利時等點名稱讚，贏得口碑。
Eva上星期24歲生日，慶祝地點夠晒特別，一對戀人去咗鑽石山志蓮淨苑(南蓮園池)。巴度話見到好多旅遊網站介紹志蓮淨苑，極具中國傳統色彩，就同Eva入去拍拖，仲讚環境夠平靜，完全不似身處平日熱鬧嘈雜嘅九龍市區，令兩人好難忘。
巴度其中一個願望，相信是贏多些馬賺多些獎金，和Eva結婚。今期(28日)巴度座騎中，第三場四班草地1200米沈集成馬房的「永旺喜喜」一連兩仗在巴度胯下得亞軍，上仗更只負一條線之微給大超班馬「不可說」屈居亞軍，可見「永旺喜喜」亦大有進步，巴度指此駒復課狀態維持勇銳，更由上次10檔移入今次一檔，論馬力足補中開齋。