律政司司長鄭若驊嘅僭建風波都刮咗成大半個月，下星期一佢將會出席立法會司法及法律事務委員會嘅特別會議，相信會係呢場風波嘅重頭戲，大家即管睇吓佢到時點解釋。
為周一上立會打底
就喺呢場大龍鳳上演之前，八方就收到風，鄭若驊噚日靜雞雞同建制派密會，唔知係咪要為場大龍鳳打底先呢？
鄭若驊第一日返工就要為僭建問題道歉，然後只係忙於解畫都唔掂。其實八方早已聽聞建制派對佢怨言，一來補選臨近，直選出身嘅建制派愛莫能助，免得自討苦吃，二來覺得同鄭若驊都冇乜交情，在情在理都好難撐喎。
正因為咁，有建制派就不滿佢新官上任，點解唔同建制派打吓招呼先呢？終於，鄭若驊噚日就靜雞雞約咗建制派政黨會面，互相打個招呼。八方又問吓其他建制派有冇如此厚待，點知「西環曳仔」、曾經話鄭若驊應否下台係「長痛不如短痛」嘅謝偉俊話冇，自由黨方面亦都係冇，反而新民黨主席葉劉淑儀就話，鄭若驊嗰邊有提出過，不過日期、時間未定。
心水清嘅建制派中人話，要見梗係見建制派大黨先啦，點都要畀面㗎嘛，至於葉劉就將會做一地兩檢草案委員會主席，遲吓仲有大把合作機會，又點可以唔傾吓呢，所以其他建制派咪冇咁先咯。八方當然覺得，鄭若驊要見嘅又豈止建制派，民主派都一樣要見，之不過連見建制派都搞成咁真係幾唔掂，正如佢自己所講，政治敏感度真係不足。
李八方