再有前特首梁振英班子嘅前官員獲政府批准再就業，前任行政長官及政治委任官員離職後工作諮詢委員會噚日公佈，運房局前局長張炳良重操故業，返香港教育大學、即係佢做校長時候嘅教育學院，做研究講座教授，亦會做科大客座教授同講者。
至於另一個申請係前民政事務局副局長許曉暉，不過佢份工有啲奇，就係做沉香學會有限公司董事同榮譽主席、同《潮學香港歷史》教育短片顧問，而諮詢委員亦已經批准。據沉香學會網站介紹，呢個會係非牟利機構，致力促進學習同研究沉香種植和產業發展。好多人或者奇怪，點解許曉暉同沉香有關？原來許曉暉做副局長嗰陣，已經因沉香同老友、沉香收藏家簡文樂一齊上報，介紹沉香嘅奧秘同歷史，聽落許曉暉做沉香學會榮譽主席又唔係咁奇。