仲有唔夠一個月就到農曆新年，好多鐵路迷都有儲新春紀念車票嘅習慣，送雞迎狗，港鐵宣佈明天正式推出戊戌狗年紀念車票套裝，乘客大年初一可以憑票無限次乘搭港鐵（機場快綫、東鐵綫頭等、往返羅湖、落馬洲及馬場站除外）。戊戌狗年紀念車票套裝內有兩張車票，每套85蚊。車票設計分別取材自中國清代著名畫家沈銓筆下嘅優閒犬群，同英國現代畫家Catriona Hall嘅個性斑點狗，非常「應節」，而每套仲附上天仁茗茶高山烏龍及菊花普洱茶各4包。港鐵同日會發售刻有賀年花紋嘅「狗年興旺」保溫壺，每個110蚊，每名顧客每次限購各項目最多兩套，售完即止。