話說上星期內會講過，特首林鄭下周三出席第一次特首質詢時間，議員提問嘅次數會計埋落答問大會。估唔到噚日竟然有建制派出口反對。事緣係議員喺答問大會提問得越多，再中籤嘅機會就越低，好讓其他議員有大啲機會提問。但將質詢時間提問次數計落答問大會，咁就有問題，因為質詢時間連問連答只得3分鐘。
民建聯蔣麗芸同張國鈞噚日忍唔住出聲，張仲講明咁樣對議員「有少少唔公道」，冇理由議員因為喺質詢問過就影響喺答問大會中籤嘅機會。
見到建制派都咁大意見，秘書長陳維安就話會同立法會主席梁君彥反映。大家即管睇吓梁君彥又會唔會捍衞議員提問嘅權利吖。