智利球星阿歷斯山齊士周一由阿仙奴轉會曼聯，除咗喺球會宣佈佢加盟嘅短片裏面，親自彈奏《Glory Glory Man United》外，更上載兩隻愛犬Atom同埋Humber着曼聯球衣嘅相喺ig度，魔性澎湃令一眾魔粉唔可以唔畀like。
山神目前喺曼徹斯特嘅Lowry Hotel下榻，佢嘅一對愛犬Atom同Humber當然有跟喺身邊，山神就更喺ig嘅動態，上載兩隻狗狗同埋一位小朋友一齊着住曼聯球衣嘅相。有留意開山神ig嘅朋友都知山神愛狗如命，視屋企入面兩隻拉布拉多犬為至寶。唔只會帶埋佢哋一齊坐私人飛機周圍去比賽，仲幫兩隻狗狗開咗專用ig，仲有過萬人關注。山神未為曼聯上陣已經咁識𠱁球迷開心，果然識做。