【今周主題：英超邊隊護級最有機?】
今季英超下游形勢非常緊湊，第10位嘅屈福特同包尾大幡史雲斯只有六分差距，所以已冇降班穩膽。睇番多隊降班大熱，筆者睇好史篤城（圖）逃出生天，全因相對史雲斯、紐卡素等同級對手，史城嘅整體球員質素較好，只要稍微調整就可重返中游。
史篤城嘅前任領隊曉士不識變通，隊中冇一對可靠翼衞仍堅持打三中堅陣式，導致場場失分，對強隊例牌被大炒，即使之後醒覺改打四後衞已經為時已晚。史城陣中並唔缺少有創造力嘅球員，梳頓沙基利有突破力，阿費利亦都有腳法同射術，而威爾斯派路祖阿倫嘅護波能力更係英超數一數二，只要正正常常分工畀佢哋，對同級球隊攞三分其實唔難。
如果睇番史城今季嘅戰績，雖然對Big 6全部被大炒，但對護級隊嘅表現可以講係超水準，屈福特、史雲斯、西布朗、修咸頓全部都係史城嘅手下敗將，再加上本身唔錯嘅班底，筆者相信史城可以上到岸。
但史城唯一嘅隱憂就係新任領隊林拔，因為呢位蘇格蘭籍教頭帶波就係冇咩風格可言，當年帶維拉亦帶到一塌糊塗，簽入辛達路斯、阿里施素高呢啲冗員，又重用艾殊利韋斯活特呢啲庸將做中場核心，埋下維拉降班嘅伏線。唯一寄望嘅就係史城班球員生生性性靠自己，咁就算林拔教得幾差都好，都有上岸嘅機會。
文：聰鳴