用34日就橫渡大西洋嘅中國划艇隊「功夫茶茶」，係一支獲李嘉誠基金會支持、來自汕頭大學嘅4名90後女大學生陳鈺麗、黎曉冰、梁敏甜同孟亞潔組成。除咗破四項世界紀錄外，仲贏得本港首富李嘉誠肯定，化身做啦啦隊隊長。誠哥不但喺4位女生橫渡大西洋時，就已經打衞星電話畀佢哋打氣，噚日仲親身同「功夫茶茶」4位女生見面，嚟個「愛的抱抱」式合照，又互相叠手打氣，真係充滿正能量。
家陣年輕人普遍都對社會充滿怨氣，誠哥就鼓勵呢4位女生做「激勵大使」，更多向年輕人分享佢哋嘅故事，希望令年輕人面對生活困難，掙扎徬徨時都可以受到一啲正能量啟發。
34日嘅海上時間當然唔易過，但4位女生早前都話有值得回味嘅時間，其中有個可能真係大家都諗唔到，竟然話喺深夜用冰水「煮」公仔麵都幾值得回味。不過，相信佢哋日後都會難忘呢段誠哥幫佢哋打氣嘅日子。