周二英聯盃四強次回合，曼城作客以3:2擊敗英冠神奇球隊布里斯托城，兩回合合計贏5:3入決賽，以晉級賀領隊哥迪奧拿教波生涯第500戰之餘，亦繼續向季內問鼎四冠嘅目標進發。
外國博彩公司開出佢哋做四冠王嘅賠率，越嚟越熱。不過，四強止步嘅布城亦要畀啲掌聲，八強淘汰曼聯後，四強首次兩回合戰曼城都係僅輸一球兼贏盤，對支持球迷已經有晒交代。
領軍贏錦標效率超摩佬
曼城首回合喺主場要靠阿古路完場前先奠定2:1勝局；到周二次回合作客出戰，雖然再靠利萊辛尼同阿古路入波一度領先到2:0，但估唔到布城冇氣餒，竟然由馬龍柏克同芬列治連追兩球扳平，以為芬列治球波都去到補時階段先入，和波機會大，點知曼城好快就再由奇雲迪布尼攻入致勝球，最後都係雙殺呢支英冠球隊晉級，下個月會去溫布萊爭霸。
曼城家陣繼續向四冠之路進發，未打四強兩回合前，博彩公司 《Betway》開出佢哋做四冠王嘅賠率係21倍，𠵱家再升溫至17倍，但幾日後對卡迪夫城場英足盃第四圈係關鍵，而哥帥賽後亦乘機用今場險勝，提吓四冠之說：「盃賽就係完場哨子聲未響起，你都唔可以鬆懈，我覺得今次俾布城追到2:2，其實幫球員上咗寶貴一課，之後我哋有英足盃同下月歐聯16強比賽，都要謹慎少少應付。」
布里斯托城最強贏盤王
儘管哥帥有少少怨言，但呢場波係佢職業生涯第500場領軍，加埋呢場已經贏咗363場，剩餘比賽就85和同52負，更值得留意係，哥帥喺教練生涯贏咗21項錦標，以目前500場比賽嚟計算，帶隊平均每踢23.8場，就贏得一項錦標，淨係呢項數據，都威過摩連奴、安察洛堤同雲格等大部份同行。
晉級過程連續淘汰屈福特、史篤城、水晶宮同曼聯等英超球隊嘅布城，喺呢項賽事就做咗贏盤王（見附表），亦完成今次歷史任務，家陣可以專注英冠賽事，而且佢哋家陣聯賽守喺第五位可爭升班，話唔定下季又同曼城等見面。