作為一個社會小縮影，立法會真係相當現實嘅地方。話說立法會噚日發表最新一份年報，入面循例講吓過去一年工作點滴，但八方睇落硬係覺得好似少咗啲嘢……唔係，係少咗啲人咁樣，原來少咗幾位被DQ嘅議員。
呢屆立法會前後DQ咗6位議員，當然頭兩位、即係青政嘅梁頌恆同游蕙禎，早喺今個年度開波之時已被DQ咗，即係未有機會做過議員工作就消失。之但係另外4位、即係社民連梁國雄、香港眾志羅冠聰、劉小麗同姚松炎，好歹都係做咗議員差不多一年先被DQ。之但係呢份年報入面，佢哋幾位彷彿冇存在過，只係喺啲大合照，好似立法會組團睇東江水，又或者參觀社福機構嘅大合照入面，先有機會亮相，立法會秘書處真係夠政治正確嘞！