【今周主題：英超邊隊護級最有機?】
今個周末英超要為英足盃讓路，部份已經出局嘅球隊，如日前大敗俾兵工廠、急需喺英超搶分護級嘅水晶宮（圖），反而可得到喘息機會。而呢支由老帥鶴臣帶領嘅倫敦球會，亦係筆者喺今屆英超混亂嘅護級形勢裏面，最睇好能逃出生天嘅一隊。
季初喺前領隊法蘭迪保亞「跟風」改踢三中堅陣式下，水晶宮經歷開季七連敗兼一球都唔入，刷新英國頂級聯賽最差開咧紀錄。幸鶴臣入主後，先重啟四後衞陣形穩定防線，中場重用米利禾積域負責掃蕩，前線就突然奇招一出，將韋費特沙夏推上前線，利用佢嘅速度、技術製造威脅都有效果，聖誕快車前更一度保持八場不敗。
雖然球隊近況回落，但表現仍有進步空間，特別係守將馬田基利復出後，演出穩健令人忘記重傷嘅史葛丹恩；前線更有巴卡利沙高挺身而出，分擔沙夏嘅入球重責。雖然射手賓迪基繼續低迷，但佢仍然可以作為橋頭堡，為沙夏、沙高、唐辛等快馬開路。
只要水晶宮今冬留得住牽制力甚強嘅王牌沙夏，中場增兵填補賓捷安長唞嘅空缺；比賽時又唔同對手鬥攻，續用守和曼城嘅穩守突擊踢法逐場搶分，一定能夠成為其中一支逃離降班旋渦嘅球隊。
文：尊嘉