【今周主題：英超邊隊護級最有機?】
修咸頓（圖）已經有11場英超無贏過波，周日打和熱刺之後，球隊更跌落英超第18位。坊間唔少評論認為，領隊柏歷堅奴被炒只係時間問題。不過，我就睇好修咸頓因為唔炒領隊而護級成功。
睇番修咸頓今季唔少比賽，表現並唔係咁差。例如主場對阿仙奴都係被逼和、周日亦係同熱刺拉成均勢下和波。今季修咸頓其中一個問題，就係和波太多，24場比賽就有10場和波。好似對熱刺嘅比賽，其實修咸頓攻守兩方面都表現唔錯，甚至比賽尾段熱刺加壓，防線依舊穩陣，仲不時有反擊機會，證明球員喺柏歷堅奴麾下，依然肯搏肯跑，未有氣餒。對比其他身陷降班漩渦嘅球隊，修咸頓亦有更好嘅人腳，左閘賴恩貝特蘭同中場杜辛泰迪治都善於製造機會，禾特普斯處理死球又有一手。只係，當查理柯士甸缺陣，前線就死咗火咁，似乎係聖人現時最大問題。
的確，賣走上季表現出色嘅後防大將華基爾雲迪積克，對防線一定有影響。但我認為柏歷堅奴善價而沽嘅決定係正確，因為留低一個有離心嘅球員，只會影響隊內氣氛。相信喺柏歷堅奴嘅執教，加上查理柯士甸復出後，聖人會重回正軌。
文:亨少