一邊飲酒一邊聽音樂，係咪好嘆呢？海洋公園今年會搞「歌酒節2018」，3月10日至4月2日一連4個周末及復活節假期共10日，由夜晚6點半至11點舉行。公園提供過百款獨特啤酒同其他酒，包括大圍啤「伍號博士茶波特啤酒」、台灣啤酒頭釀造嘅白露啤酒等手工啤。
海洋公園管理及演藝節目執行總監Timothy就介紹另一重頭戲「本地狂熱音樂會」，每晚有兩場45分鐘表演，包括側田、ToNick、陳柏宇、周國賢、盧巧音等20多位歌手同樂隊。
音樂會套票分為180蚊同280蚊，本周五喺購票通網站開售，套票中有30蚊電子餐飲代幣，一張套票有得聽歌又有得食。若只想嘆啤酒同美食，就可用50蚊購買儲有50蚊嘅電子餐飲代幣入場，持海洋公園日間門票人士仲可以繼續玩到晚上11點，免費體驗歌酒節。