轉眼又一年，就到農曆年尾，做打工仔嘅梗係望實份雙糧啦，而一班立法會議員身邊，都有一班為佢哋賣命嘅議員助理。議助呢份工唔係咁好打，一來議員每4年就要選一次，即係份工做4年就隨時冇得撈；二來議員資源有限，議助人工都唔高得去邊，但凡事總有例外。
八方最近睇過議員開支申報。直選議員因為議辦多，自然請 得多人，人均收入一般都係萬幾2萬蚊月薪，當然有啲資深嘅議助攞到4、5萬，甚至6萬。
功能組別就唔同，最闊佬嘅係經民聯金融服務界張華峰，佢請咗4位助理，最低人工嗰位都3.5萬，最高嘅有近7.4萬，按政府計法，呢個已經係高級公務員嘅人工，估唔到出手同身形都咁有份量。肥老闆好自豪咁話，呢位高薪助理係以前自由黨嘅中堅分子嚟㗎，佢相當熟悉政府嘅做事程序，所以梗係用高人工請佢啦！
廖長江吳永嘉出O
至於民主派方面，最畀得起錢嘅都係功能組別，衞生服務界李國麟有位助理嘅月薪高達6.3萬。李國麟話，呢位助理跟咗佢好多年喇，自己話晒做工會出身，冇理由待薄員工啫！以下兩位議員同樣值得畀吓掌聲。建制派班長、中總代表廖長江同廠商會代表吳永嘉兩位工商界議員，原來有為員工提供超時補水。廖長江講，呢啲係僱主嘅應有責任，員工付出咗勞力，梗係應該有相應嘅收穫啦！
八方講埋邊位議員議辦最叠馬。直選議員係需要多啲助理嘅，一般都有約10個，不過多到好似許智峯咁有22個都幾誇張。佢好無奈咁話冇計啦，要做好多地區工作，又要搞居民活動，真係唔係咁容易㗎。
建制派直選議員中最多助理嘅又係港島區，民建聯張國鈞請咗14位助理，不過睇真啲，有5位係同黨友李慧琼夾份嘅。張國鈞話，直選議員錢唔多、工作就大把，特別係做個案跟進，跟開一單就會越收越多。睇嚟水浸嘅特區政府真係要認真考慮吓加多啲資源畀議員喇！講到尾，議員出畀助理嘅人工都係公帑嚟嘅，除非超出上限要自行補貼。究竟出高啲人工但請少啲人，畀部份人先富起來好？定係出少啲人工但請多啲人製造多啲就業機會好？咁就見仁見智喇。
李八方