已改名保阪尚希嘅過氣男星保坂尚輝，早在90年代時，佢曾經係日本藝能界靚仔小生，13歲被星探發掘，出道後就機會不斷，最忙時曾同一時期接拍六部作品，當紅時接拍多套日劇及電影，包括夥拍安達祐實嘅經典劇集《沒有家的女孩》，佢日前接受訪問仲話當年正值日本泡沫經濟時代，其拍劇酬勞近30萬港元一集，每月收入多達1.2億日圓（約849萬港元），錢多到冇掟使，更以買車為樂，最高峰擁有38架車。
保坂尚輝曾與高岡早紀結婚，當年高岡早紀被雜誌拍到同歌手今井美樹嘅老公布袋寅泰在酒吧擁吻，高岡早紀更被摸胸，令佢同保坂尚輝離婚收場。保坂尚輝經歷兩次婚姻失敗，現年50歲嘅佢一度淡出幕前，近年就有亮相當地節目受訪，早前就談到呢幾年轉行從事通信販賣行銷顧問，生意做得有聲有色，公司一年營業額高達10億日圓（約7,000萬港元）。
近日，保坂尚輝上關西電視台《爆料內幕》節目受訪，自爆18年前一度面臨生死邊緣，佢表示當時因為突發性腹膜炎引起內臟破裂，後來緊急送醫動手術才救回一命，醫生話如果佢遲一步接受治療，好可能已經冇命，嗰次真係同死神擦身而過。保坂尚輝憶起2000年元旦早上，佢突然覺得好唔舒服，事前完全沒有任何徵兆，佢突然痛到郁唔到，當時前妻高岡早紀都冇特別在意，反而先帶細路到神社參拜，等到家人回家才發現保坂尚輝在床上全身標冷汗，高岡早紀才急召救護車將佢送醫，經診斷後確定係腹膜炎引起內臟破裂，緊急動八個小時手術才遠離鬼門關。