早前，香港市區氣溫都低見7點幾度，寒冷天氣警告都掛足幾日，搞到不少診所都大排長龍，而馬場啲馬仔最多都披件衫仔，就一早落場操馬，不知佢哋夠唔夠暖呢？
其實近日賽前因發燒，而退出比賽嘅馬仔，由上月開始計算，數目已累積至九匹，其中包括呂健威馬房三駒「順其自然」、「英明勇將」及「快樂生活」，還有其他馬房的，例如「華恩庭」、「彪形猛漢」、「知道勝」、「永常喜」及國際賽外隊馬「空心錫人」。
而最新喺今個月17號再有一匹「開心神駒」，背後有幾多非出賽馬喺馬房發燒，確實未知之數。根據馬會資料，很多時候三幾個月先驗出一匹馬發燒，但咁短時間，有咁多匹馬都有呢個發燒症狀，似乎絕不尋常。
然而，衞生署衞生防護中心喺今個月10號，已宣佈香港已踏入今年冬季流感季節，截止9號更錄得十宗流感死亡個案。今次多匹馬發燒嘅事件，希望只係個別案件，並不會引發大規模馬流感事件。
須知呢隻病致命率雖低，但傳染性高，否則如果回到92年300駒一同染上馬流感，導致賽事停咗一個月，到時真係頭痕了！
值得一提，天文台預料今個月27及28日，氣溫或跌至10度，大家真係要保重呀！