英超禮拜日獨腳戲，近態反覆嘅熱刺作客修咸頓，都係靠射手哈利卡尼頭槌頂入一球，逼和1:1完場，繼續排喺第五位，而後面嘅宿敵阿仙奴已經追到三分之差喇！
熱刺賽前陣中感冒菌肆虐，門將洛里斯同基斯甸艾歷臣都病咗缺陣，而且近期成績幾差嘅修咸頓，一開場就有晒搶分決心狂攻。15分鐘，左閘賴恩貝特蘭左路傳個急勁地波入中間，達雲臣山齊士想解圍，點知篤咗入自己龍門。不過三分鐘後，哈利卡尼接應角球，喺六碼點頂入扳平（圖）。
換邊後兩隊啲攻勢放緩，而熱刺喺冇乜組織下，都係靠高波或者強行突破勉強進襲，去到成70分鐘，熱刺先換入拉美拿，最後都幫唔到球隊贏波，結果俾阿仙奴追近咗，兩隊只差三分排五、六位。修咸頓亦11場聯賽不勝，跌到落尾三位置，領隊柏歷堅奴帥位岌岌可危。