八方相當年：
小聰聰神邏輯考　第11勁過第1 - 李八方

香港眾志主席羅冠聰2016年以23歲之齡成為香港有史以來最年輕嘅立法會議員，點知唔夠一年就被政府DQ。24歲對好多人嚟講只係一個同朋友嘻嘻哈哈嘅年紀，但阿聰已經歷當選、被DQ甚至入獄。阿聰話細個根本冇諗過從政，只係一個鍾意踢波同打機嘅普通後生仔，但踏上從政路卻不後悔。
阿聰喺普通家庭長大，小學最開心係同隊友去踢波、比賽，細細個已經能言善辯，有次考第11被媽媽話，點知佢竟然駁嘴：「11即係兩個1，仲好過考第一喇！」激到媽媽紮紮跳。

因大哥認識學聯

中六嗰年劉曉波拎諾貝爾和平獎，阿聰就讀嘅左校校長喺早會詆毀劉曉波，從而啟發佢對政治嘅興趣。但其實佢冇提及另一大原因，就係佢大哥，阿聰透露大哥係半個社運人，曾任大學學生會莊員，因為大哥佢先加入嶺大學生會，仲認識咗學聯成員，成為學聯常委。但阿聰始終好保護家人，唔想透露太多家人嘅細節。
阿聰有樣嘢始終如一，就係鍾意打機。大學一年級暑假就因為鍾意打機而做電競旁述，八方仲八到當年佢係鑽石級LOL（League of Legends）玩家。佢話從政後好忙，最近又要幫黨友周庭助選而打少咗好多機。