皇家馬德里喺周日西甲，主場大炒拉科魯尼亞7:1。之前一場11射一球不入嘅基斯坦奴朗拿度（C朗），喺今場梅開二度。C朗一向貪靚，喺佢入第二球時誤被對手踢到額頭搞到爆缸，佢行埋場邊第一時間就借咗部手機，睇吓有冇破相。
入兩粒反吸拉科7:1
皇馬喺今季西甲唔多理想，周日迎戰拉科之前，三場聯賽得一分，其中兩場主場全部輸晒；加上有傳皇馬頂唔順今季低迷嘅C朗，想賣走佢，連皇馬球迷投票，都有過六成人認為C朗應該要走，對C朗嚟講都咪話唔心噏。
今場迎戰拉科，皇馬先喺23分鐘失波，好在完半場前由拿祖費南迪斯同加里夫巴利各入一球反超。換邊後巴利同莫迪歷先後建功，到78分鐘終於到C朗發威射成5:1；C朗喺84分鐘頭槌攻門再入一球，接應傳中彎低身迎頂，入到波同時被對手守將踢中塊面，即時血流披面。
C朗除咗靠對腳，仲靠埋個樣搵食，被人踢到破相仲得了？所以今次受傷，佢走埋場邊接受軍醫治理，第一時間拎咗對方部手機，用嚟影自己嘅傷勢。最後皇馬喺完場前由拿祖再入一球，以7:1大破拉科。
皇馬教練施丹喺賽後都有講到C朗傷情：「佢被踢中受傷，縫咗兩三針，我相信並冇大礙。」皇馬今場重排4-3-3，賓施馬亦傷癒候命，到下半場入替，「BBC」再次同場合作。
同日西甲榜首巴塞隆拿一樣靠後勁贏波，作客貝迪斯喺半場互無紀錄，易邊後由拿傑迪錫打破僵局，加上美斯同蘇亞雷斯各入兩球，最後以5:0大炒對手。