立法會發言不時令人不明所以嘅新民黨容海恩,上周五晚喺fb自爆發現「不明飛行物體」入侵家中露台後,噚日罕有單人匹馬喺立法會咪兜講述事件。恩恩豬話上周五晚,佢媽媽喺灣仔二樓寓所打掃屋企期間,突然聽到「嘭嘭」兩聲,之後出露台就發現有一架航拍機跌咗喺露台,擔心被人偷拍而報警。
熟女莊教落窗簾
恩恩豬話發現呢部航拍機時,機身有着燈,顯示仲有四格電(圖),唔知影咗幾耐,話媽咪用魚網網住部機後,即刻掹走機中電池,但冇查過裏面有冇SD卡,唔知有否錄到屋內情況。容母約3小時後,見無人上嚟攞番部機,就攞埋部機去灣仔警署報案兼錄口供。
恩恩豬擔心今次會洩漏個人私隱,大鬧政府現時監管航拍機法例有漏洞,希望個人私隱專員公署檢討無人機使用指引。路過嘅公民黨陳淑莊聽到都對佢遭遇深表同情,仲分享落窗簾「秘技」:「一滴光都唔透㗎。」陳又笑言即使有人偷拍,都冇嘢好睇。恩恩豬笑稱相信唔同偷拍人士都有唔同喜好。被問到會唔會同佢緋聞有關時,佢就話:「我唔相信係囉……點知佢哋係咪想影其他嘢?」
警方話灣仔警署喺20日接獲64歲姓余女子報案,話其太和街住所露台發現來歷不明嘅航拍機,懷疑被人偷拍,案件由灣仔警區刑事調查隊第二隊跟進,暫未有人被捕。
李八方