放完長假怕返工，相信都係唔少打工仔嘅心聲。英航近排做咗個網上調查，收集11個國家同地區居民嘅外遊習慣，結果發現勤勞嘅香港打工仔，原來連放假都放得唔安落。調查問咗2,001個16至55歲嘅香港居民，有成63%人就話，放假之後不單感覺唔到真正輕鬆咗；有37%人仲話，放完大假外遊之後返工，直頭會覺得緊張同不安，比例多過晒日本、馬來西亞、新加坡同印度，係亞洲地區之中最高。
調查亦都發現，受訪港人舊年平均出埠玩3次，數字表面好似好多，但其實比較起其他接受調查地區只係一般水平，日本人就出門最密、舊年平均去咗8次旅行。香港人點解去唔到旅行呢？有63%人話係份工太綑身，連大假都清唔晒，有12%人話儲假儲到爆晒額，至少冇咗6日假㖭。仲有成12%人仲話如果清假太盡會內疚，搞到咁，八方就覺得打工仔似係奴工多過勞工囉。