新一屆全國政協港區委員，似乎都有唔少女將上榜。繼民建聯主席李慧琼料任全國政協委員、工聯會會長林淑儀料由全國政協升呢至常委後，now新聞台引述消息話，世衞前總幹事陳馮富珍都榜上有名，而且唔只委員咁簡單，仲係一上榜已經係新一屆常委熱門人選，據聞年屆70嘅佢好獲阿爺重視，有此厚職亦唔出奇。
而近年無論係港區人大抑或政協委員，不時見到前問責官員嘅身影，消息話，梁班子時代兩名局長包括食衞局高永文同保安局黎棟國，同樣會喺名單之上，估唔到唔只做完特首可以做政協副主席，原來做完局長都係政協委員搶手貨，唔知呢啲延後身份象徵，能否鼓勵到多啲人入熱廚房？
至於其他備受重視嘅政商界猛人，仲有近日影響力備受關注嘅前特首董建華有冇得留任，尤其梁振英已經係全國政協副主席嘞喎……全國政協常委會今日開會審議名單，相信之後自有分曉。