2015年任食衞局局長時，試過出席跑步活動時仆親，搞到顴骨骨裂血流披面，要入廠縫針兼休息兩周嘅高永文，噚日為撐好友、民建聯九西補選參選人鄭泳舜（杏兒姐夫），不惜陪跑街站，由紅磡碼頭跑到去黃埔街巿後，再跑去黃埔港鐵站口擺街站。
高醫生喺鄭泳舜玩fb直播時，冇提水叫對方攬攬自己，只稱噚日係自己第一次跑街站，向鄭笑言：「我第一次畀咗你嘞！」身為九西選民嘅佢話會動員家人朋友撐鄭。
上次直播時獲元秋教路而「爆紅」嘅杏兒姐夫，邊自拍邊跑步，民望高唔知係咪跌親後有陰影，跑步時相當專心，仲吩咐鄭：「你唔好畀我揸（自拍棍）啊！」「你唔好叫我講嘢，我冇氣㗎吓，我跑到已經算好彩。」鄭泳舜期間亦叫民望高睇路，慎防佢又跌倒。